وبعد أيام قليلة، وفي المساء، وصلت طائرة الخطوط الجوية الفرنسية إلى مطار القاهرة الدولي وعلى متنها 'جمال' مع عائلته ومساعده 'أكرم' الذي يهتم بطلباته. استقبالهم 'عبد الحميد' وساعدهم في استكمال إجراءات الوصول، وأصطحبهم بسيارته إلى فيلته الخاصة ليسكنوا معه مؤقتاً حتى يتمكن من متابعة حالة 'جمال' الصحية. وصل 'عبد الحميد' إلى الفيلا الخاصة به وفتح الباب لنفسه آلياً، وجاء العمال لحمل الأمتعة من السيارة. دخل الجميع إلى الصالة، وهناك طلب 'جمال' من 'أكرم' أن يذهب إلى المطبخ ويخبر الطباخ أن يحضر العشاء إلى غرفة نومه. وطلب من 'عبد الحميد' أن يذهب معه إلى المكتب ليتحدثا على انفراد..
أمسك 'عبد الحميد' بيد 'جمال' وسانده وذهب معه إلى غرفة المكتب وساعده في الجلوس على الكرسي..
'عبد الحميد' :- على مهلك !!
جلس 'جمال' ببطء..
'جمال' :- أيوااا، أشكرك !!
ترك 'عبد الحميد' يد 'جمال' وجلس على الكرسي المقابل له..
'عبد الحميد' :- أيوه قولي إيه الكلام اللي سمعته منك !!
'جمال' - بأسف - :- زي ما قولتك في الموبايل أنا تعبان قوي وعايزك تأخذني لأحسن دكتور في مصر وتعمل لي كل الفحوصات مرة ثانية اللي عملتها في باريس أتاكد من حالتي الصحية !!
'عبد الحميد' :- حاضر يا عمي، وأطمن إن شاء الله خير. لكن لو قولتلي من البداية كنت أخذتك لأشهر دكتور متخصص في علاج الأورام، وكل حاجة هنا بقت متوفرة زي فرنسا. أو كنت سافرت معاك، لكن قولي دلوقتي ليه سافرت 'نرجس' معاك؟ هو أنت طلبت منها تسافر معاكم ؟!!
'جمال' :- لا أبداَ. انا قولت لـ 'إيزابيل' أني حاسس بتعب قوي واتفقت معاها نسافر وحدنا بطيارة الفندق الخاصة، لكن بعد ساعات لقيت أنها و'نرجس' حجزوا تذاكر على مصر للطيران لنا إحنا الثلاثة، وسافرنا بسرعة !!
'عبد الحميد' :- الحقيقة أنت غلطت لما سافرت من غير ما تقولي، وكمان أخذت مراتي من غير إذني !!
'جمال' :- فاهم زعلك، لكن أنا لما بدأت أحس بالتعب فكرت مااشغلش بالك حتى تنتبه على مصالحنا في القرية والفندق !!
'عبد الحميد' :- خلاص اللي حصل حصل !!
'جمال' :- 'عبد الحميد' أنا حاسس أن مراتي وبنتي عملوا خطة مع الدكتور يقولوا إني مريض بالسرطان !!
'عبد الحميد' :- بعد الشر عليك يا عمي، لكن معقولة يكذبوا عليك بمرض زي دا ؟!!
'جمال' - بعصبية - :- أيوة حتى يقدروا يأثروا عليا وأتنازل عن كل ممتلكاتي لـ 'نرجس' عن طربق عقد البيع والشراء !!
مسح 'عبد الحميد' ذقنه بأطراف أصابعه عدة مرات وهو يفكر في كلام 'جمال'. واصل 'جمال' كلامه..
'جمال' :- ودلوقتي بعد رجوعي لمصر خايف يفكروا في خطة ثانية، ويجي يوم وأصحى وألاقي كل حاجة بقت باسم 'نرجس' !!
'عبد الحميد' :- خلاص مافيش حل قدامنا غير أنك تعمل لي توكيل وأكون الوحيد اللي يحق له التوقيع نيابة عنك، وفي دي الفترة هكون مركز أكثر على أي ورقة امضي عليها !!
'جمال' :- حاضر، لكن أنت هتكون المسؤول الوحيد قدامي لو قدروا ينفذوا اللي في دماغهم ولو بالتزوير..!!
'عبد الحميد' - مقاطع - :- عايز أقولك على حاجة ومن المفروض أني ماأقولكش عليها علشان حالتك لكن انت لازم تعرفها !!
'جمال' :- أعرف إيه ؟!!
'عبد الحميد' :- أني تجوزت !!
'جمال' - بدهشة - :- تجوزت ؟!!
'عبد الحميد' :- كنت حاسس إن 'نرجس' مش هتقولك !!
'جمال' :- امتى تجوزت؟ وليه ؟!!
'عبد الحميد' :- تجوزت من أيام قليلة والسبب سفر بنتك من غير ما تأخذ إذن مني، أو على الأقل تبلغني بسفرها !!
'جمال' :- ومين دي اللي اتجوزتها ؟!!
'عبد الحميد' :- هقولك كل حاجة عنها ولكن في وقته !!
'جمال' :- وأنت فكرت بالسرعة دي ونفذت قرارك بخصوص الجواز؟ واضح أنك كنت بتحبها من قبل ورتبت أمورك قبل ما نسافر فماتخليش سفر 'نرجس' عذر لجوازك !!
'عبد الحميد' :- والله عمري ما فكرت اتجوز عليها ولا كان في بالي حاجة أصلاً اسمها جوازة ثانية، إلا لما تعبت من تصرفات "بنتك" معايا وتحديها لكل كلمة أقولها عليها !!
'جمال' - بسخرية - :- "بنتي"؟ هه مش لايق عليها الكلمة. دي عايزة مع والدتها أموت بسرعة علشان الفلوس رغم أنها مش محتاجة لفلوس أكثر !!
'عبد الحميد' :- وهو لسه في حاجة ناقصها علشان تفكر تشتريها؟ الطمع اللي في بنتك مالوش نهاية. كان لازم تفكر تربيها من غير دلع زايد !!
'جمال' :- وأنت لما بتفكر تعمل حاجة بتعملها من غير ما تقولي !!
'عبد الحميد' :- وعمري ما أخذت قرار وندمت عليه لأني بفكر زي لاعبي الشطرنج اشوف إيه هي الخطوة الجاية بعد قراري !!
'جمال' :- طيب وقرارك بالعروسة اللي اتجوزتها مناسبة لعيلتنا ومركزنا الإجتماعي، ولا واحدة وقعتك من..!!
'عبد الحميد' - مقاطع - :- هي صديقة أختي المقربة من أيام الجامعة !!
'جمال' :- اااه يعني زي ما قولت كان في بينكم قصة حب ودلوقتي لقيت فرصة تتجوز من حبك القديم !!
'عبد الحميد' - بسخرية - :- هاهاهاها أنا أحب واحدة زيها؟ هو يعني من قلة النسوان ؟!!
'جمال' :- إيه قصدك ؟!!
'عبد الحميد' :- لما تشوفها هتعرف قصدي !!
'جمال' :- لما اشوفها؟
ممكن تفسر إيه قصدك ؟!!
'عبد الحميد' :- أنا أخذت واحدة مافيهاش ملامح جمال خالص. وماتقدرش تشوف كويس. وبتعرج في مشيتها !!
'جمال' :- نعم؟ ودي هتعمل بيها إيه ؟!!
'عبد الحميد' :- ولا حاجة بس علشان تعرف 'نرجس' أن الجمال مش كل حاجة وأني حبيت واحدة أقل من جمالها بكثير. طبعاً أنا ماحبيتهاش ولا حتى أعرفها، لكن قدام بنتك هي حبيبتي الغالية !!
'جمال' :- خلي في بالك أنها لسه بنتي وقطعة مني، ومش عايز أشوف دمعة نازلة من عينها، فلو سمحت العروسة دي مش هتجمعها مع بنتي تحت سقف واحد !!
'عبد الحميد' :- هاهاهاها وهي بنتك معاها قلب تحس بيه؟ دي مش حاسه بأولادها فلذات أكبادها. سافرت وسابتهم من غير ما تعيط على فراقهم زي بقية الأمهات. في الحقيقة عايزك تعذرني لأني بفكر أجمع بنتك مع عروستي قريب حتى تشوف بعينها إختياري الجديد ولكن بعد ما يخلص فرح ابن خالي !!
قام 'عبد الحميد'..
'عبد الحميد' :- ودلوقتي بعد إذنك هروح أشوف الهانم بنتك أسلم عليها وابشرها بالهانم الجديدة. تحب يا عمي أوصلك لاوضتك ترتاح !!
'جمال' :- لا يا بني روح شوف مراتك بس نادي لي 'أكرم' يساعدني !!
'عبد الحميد' :- حاضر يا عمي، وبكرة جهز نفسك، هنروح للدكتور ونعمل لك كل الفحوصات اللازمة. وإن شاء الله نطمن عليك !!
'جمال' :- إن شاء الله !!
༺༻
غادر 'عبد الحميد' المكتب وذهب إلى غرفة نومه فرأى 'نرجس' جالسة مسترخية والعاملة 'علية' أمام الخزانة ترتب لها ملابسها من الحقيبة..
'عبد الحميد' :- 'علية' ؟!!
التفتت 'علية' نحوه..
'علية' :- نعم سعادتك تحت امرك !!
'عبد الحميد' :- ممكن تسيبينا دلوقتي وتكملي شغلك بعدين !!
نظرت 'علية' إلى 'نرجس' بقلق ورأت في عينيها نظرة تهديد بأن لا تنفذ أمر 'عبد الحميد' بالخروج. انتبه 'عبد الحميد' لنظرات 'نرجس' لكنه تجاهل واتجه نحو 'علية'..
'عبد الحميد' :- 'علية'؟ مش عايزاني أسلم على مراتي حبيبتي بعد رجوعها بالسلامة من السفر ؟!!
نفخت 'نرجس' صدرها بتأفف، وأشارت لـ 'علية' بالخروج. غادرت خائفة من ردة فعلها عند رجوعها وأغلقت الباب أمامها بهدوء. التفت 'عبد الحميد' إلى 'نرجس' وأبتسم لها بسخرية وفتح ذراعيه..
'عبد الحميد' :- حبيبتي وحشتيني قوي تعالي لحضني !!
ابتسمت 'نرجس' أنه لا يزال تحت سيطرة جمالها وفتنتها..
'نرجس' - باحتقار وسخرية - :- مش أنت يا عريس اتجوزت علي؟ خلاص خليها هي اللي تحضنك هههههه ولا انت أتجوزت حركات منك علشان أغير عليك؟ اطمن مش هغير عليك حتى لو تجوزت عليا ثلاث ستات مرة واحدة !!
انزعج 'عبد الحميد' من عدم اهتمامها به، فأخفض ذراعيه..
'عبد الحميد' :- أنا فعلاً تجوزت عليكي، لكن قولت من حقوقك أفرح برجوعك لبيتك وأسلم عليكي !!
نهضت 'نرجس' بغضب والشرر يخرج من عينيها..
'نرجس' :- اسكت. أنا عارفه أنك أتجوزت. وصلني خبر جوازك من السفارة المصرية !!
'عبد الحميد' :- وليه ماشفتش أي رد منك؟ وكمان خبيتي الخبر عن والدك ؟!!
'نرجس' :- لأنك أصلاً ماتهمنيش وأقدر اجيب عشرة زيك وماقولتش لبابا لأني عارفاه مش هيقول حاجة لأنه دائماً واقف في صفك، أنا بس بيهمني دلوقتي فلوس بابا، مش هخليك تصرف عليها قرش واحد !!
ابتسم 'عبد الحميد' بسخرية ونظر إليها بحزن..
'عبد الحميد' :- مش غريبة عليكي، كنت عارف أنك هتخافي على الفلوس أكثر مني، ومش هيهمك أن في زوجة ثانية تشاركك فيا !!
'نرجس' :- خليها حتى تأكلك أنت ماتهمنيش يا عريس، لكن قرش واحد زي ما قولت لك مش هتصرف عليها. أسمع أنا هقول لبابا يشغل محاسب مهمته بس يراجع كل جنيه تصرفه !!
'عبد الحميد' - بجدٍ - :- هو مين يا ماما اللي يراجع بعدي؟ أنا الوحيد اللي بتحكم في الحسابات، وأنتي هربيكي من جديد وهمنعك تاخذي أكثر من حاجتك. أنتي بقيتي زي الحوت عايز يأكل كل حاجة !!
'نرجس' :- ههههه مين دا اللي هيربيني؟ أنت؟ أنت يا حبيبي هتسيب كل حاجة وتخرج من هنا زي ما جيت وكمل شهر العسل مع عروستك ولكن في الشارع ههههه !!
'عبد الحميد' :- أنا بستحملك علشان خاطر والدك الطيب بس، وأعملي حسابك أننا بعد أسبوع هنسافر لشرم الشيخ نجتمع مع العيلة نحتفل بجواز ابن خالي، وبعدها هجيب عروستي "الحلوة" تعيش معاكي هنا في فيلتي، وأنتي اللي هتخدميها !!
'نرجس' :- أنت هطلق وتروح معاها بالسلامة أو ممكن أسمح لكم تشتغلوا عندي مع بقية العاملين هههههه !!
'عبد الحميد' :- الطلاق مش في بالي دلوقتي علشان أولادك وعلشان والدك الطيب. وأنا هعرف إزاي اربيكي !!
خرج 'عبد الحميد' غاضباً وفكر في جلب عروسه لتعيش مع 'نرجس' في مكان واحد ويقضي على غرورها..
ولكن كيف وهو لا يريد إطلاقاً رؤية من اختارها لتكون زوجته..
༺༻