بعد أسبوع من وفاة والد 'توليب'، ذهبت 'حنان' إلى منزلها لزيارتها والتناقش معها في مسألة زواجها من 'عبد الحميد'. فتحت 'توليب' الباب وفرحت بزيارة صديقتها..
'توليب' - بفرحة - :- أهلاً يا 'حنان' جيتي في وقتك. ادخلي الفطور جاهز !!
'حنان' - بغرور - :- طبعاً أنا دائماً آجي في الوقت المناسب !!
دخلت 'حنان' و'توليب' وجلستا على الطاولة، وبعد دقائق قليلة التفت 'حنان' إلى 'توليب' التي كانت مشغولة بالأكل..
'حنان' :- 'توليب' ؟!!
'توليب' :- هممم !!
'حنان' :- 'عبد الله' ابن أخوكي المرحوم 'زياد' لسه هنا ؟!!
'توليب' :- آه لسه هنا لكن هو نايم دلوقتي. وبعد بكرة هيرجع للإسكندرية بإذن الله يلحق دوام مدرسته !!
تركت 'توليب' الأكل وتذكرت كلام 'عبد الله'..
'توليب' :- مسكين 'عبد الله' خايف عليا أعيش وحدي بعد موت والدي، فعرض عليا أني أسافر معاه للإسكندرية حتى بأخذ باله عليا !!
'حنان' :- وأنتي عايزة تسافري معاه ؟!!
'توليب' - بضجر - :- هه أنتي فاكره أن مرات أخويا هتوافق أني أعيش معاهم؟ هي أصلاً مابطقنيش ولا أنا بطيقها و'عبد الله' مش هيعرف يسكني فين لو وافقت وسافرت معاه !!
'حنان' :- خلاص اطمني أنتي مش هتسافري أي مكان لأني لقيت لك على عريس !!
رفعت 'توليب' رأسها والتفتت نحو 'حنان'..
'توليب' - بدهشة ومازحة - :- عريس؟ مين هو؟ يعني جوزك وافق !!
'حنان' - بفزع - :- إيه يا أختي حرام، ليه الكل حاطط عينه عليه؟ أنتي بتفكري تأخذيه مني ؟!!
خفضت 'توليب' رأسها، مكملة فطورها..
'توليب' :- يعني إزاي هتقدري تلاقي لي عريس بالسرعة دي غير جوزك الحلو ؟!!
'حنان' :- لاااا سيبي جوزي في حاله، هو مسكين مش بتاع جواز مرة ثانية !!
تذكرت 'توليب' والدها..
'توليب' - بحزن - :- أنتي عارفه يا 'حنان' أني عايشه الأيام دي بفترة حداد على والدي، فمش عايزة أسمع لا سيرة جواز ولا طلاق !!
'حنان' - بفزع - :- طلاق؟ فال الله ولا فالك، وفترة الحداد خلاص انتهت من أيام، وأنتي هتتجوزي الليلة !!
توليب' - باستغراب - :- الليلة ؟!!
'حنان' :- أيوة الليلة زي ما سمعتي، عمي 'عبد الصبور' هيفرح أنك خلاص لقيتي الإنسان اللي هياخذ باله عليكي !!
'توليب' :- يعني أنتي بتتكلمي بجد ؟!!
'حنان' :- أيوة بتكلم جد الجد، والليلة هتتجوزي واحد لقطة حليوة !!
'توليب' :- مين هو ؟!!
'حنان' - بكل فخر - :- أخويا !!
'توليب' :- مين أخوكي ؟!!
'حنان' :- ومن غيره؟ 'عبد الحميد' !!
سمعت 'توليب' اسم 'عبد الحميد' فشعرت بالغضب..
'توليب' - بحدة - :- وهو ليه فكر يتجوزني دلوقتي؟ هو خلاص شبع من حبيبة القلب؟ اسمعي عايزاكي تقولي له أني مش موافقة عليه !!
'حنان' :- اطمني ولا هو موافق عليكي !!
'توليب' :- نعم ؟!!
'حنان' :- ماتفرحيش وتفكري أنه غارق في حبك، ما أنتي عارفه لا هو يعرفك ولا جيتي في باله في يوم أنه يشوفك !!
'توليب' :- نعم ؟!!
'حنان' :- دي الحقيقة ؟!!
'توليب' :- أومال إيه السبب اللي خلاه يتنازل ويفكر يتجوزني !!
'حنان' :- اسمعي كويس الحكاية من أولها. أخويا بقى قرفان من دلع مراته، ومن أسبوع جاء لبيتي وطلب مني أدور له عروسة كده هبلة توافق تتجوزه من غير ما تتجوزه !!
'توليب' :- تتجوزه من غير ما تتجوزه؟ إيه هو اللغز العجيب في اللي بتقوليه ؟!!
وتذكرت 'توليب' أنها سمعت كلمة "هبلة"..
'توليب' :- وتقصدي أني أنا الهبلة ؟!!
'حنان' - مازحة - :- أنتي مش هبلة قوي. أنا بس فكرت تكوني العروسة لأني عارفه إنك بتحبي 'عبد الحميد' من أيام ما كنا بندرس في الجامعة !!
نهضت 'توليب' من الطاولة بعصبية..
'توليب' :- إيه اللي بتقوليه وأنتي عارفه أني ولا عمري شفته حتى أحبه زي ما بتفكري ؟!!
'حنان' :- أنتي فاكره أني هبلة زيك مش هقدر أكشف حبك لأخويا؟ كنت بشوفك غرقانه في الحب وأنتي بتبصي بهيام لصور أخويا في أوضتي، وغير أنك سرقتي ثلاث صور ليه من ألبوم عيلتي، فاكره ؟!!
'توليب' :- أنتي..!!
'حنان' :- أيوة عارفه، وشفت يوم ما انهارت نفسيتك لما سمعتي أنه خطب 'نرجس'، ويوم كمان ما أعصابك تدمرت على الآخر يوم ما أتجوز وقولتي أنك تعبانه مش فاكره كده موت ابن بنت عم مرات أخوكي؟ هو ده كلام يا بنت يدخل العقل؟ مافيش داعي للإنكار، أنتي دائماً مشاعرك واضحة على وشك زي الشمس. ودلوقتي أقعدي خليني أكمل كلامي للآخر حتى نتفاهم !!
جلست 'توليب' بخجل..
'حنان' :- أسمعي كلامي كله أول حاجة وبعدين فكري وخذي قرارك ولكن بسرعة !!
'توليب' :- حاضر !!
'حنان' :- هتكلم من غير مقدمات، أنتي عارفة أن أخويا اتجوز الست 'نرجس' ويمكن صح يكون وقع في حبها، وده لأنه حاسس أنه بيحمل لها جميل لأنها ساعدته بفلوس والدها يطلع لفوق، ويمكن حبها أكثر لما خلفت له التوأم الولد والبنت !!
'توليب' - مقاطعة - :- أنتي دلوقتي عايزه إيه؟ عايزة توضحي لي ولا عايزة تقتليني؟ أي دي حبها حبها ؟!!
'حنان' :- صبرك عليا خليني أكمل كلامي !!
'توليب' :- اووف أمري لله كملي !!
'حنان' :- لكن أنا متأكده أنه عمره ما حبها، هو بس حامل لها جميل على خدماتها ليه !!
'توليب' :- طيب وبعدين إيه المطلوب مني دلوقتي ؟!!
'حنان' :- ولا قبلين أنتي هتتجوزيه الليلة !!
'توليب' :- أنتي مجنونة صح؟ ومعاكي حق أني هبلة لأني ماعرفتش بجنانك غير النهارده !!
'حنان' :- أسكتي، أول حاجة أفهمي كلامي كويس. أخويا طلب عروسة يتجوزها حتى بس يقهر 'نرجس'، بشرط أنها تكون بشعة !!
'توليب' - بدهشة - :- تقصدي أنك شيفاني بشعة كمان ؟!!
تجاهلت 'حنان' كلام 'توليب' وتابعت..
'حنان' :- بصي، أنا أخترتك لسبيين، السبب الأول هو أنك بتحبي أخويا، والأرواح جنود مجندة، فما تعارف منها أئتلف يعني اللي بتحب بتتلاقى وتتآلف زي ما قالنا رسولنا الكريم عليه أفضل الصلاة والسلام. وأخويا بإذن الله هيجي مصيره ويحبك. والسبب الثاني والأهم أني أشوف 'نرجس' تموت قدام عنيا أن أخويا نفذ تهديده وبقى راجل قدر يوقف قدام غرورها !!
'توليب' :- طيب وإزاي أتجوزه وأبويا ميت من أسبوع بس؟ أسمعي أنا بقول أنه ماينفعش أتجوز الجوازة دي واللي أنا مش فاهماها ؟!!
'حنان' :- قولتلك يا بنتي أيام الحداد خلاص انتهت، وهي ثلاثة أيام بس، وعمي ربنا يرحمه برحمته هيفضل عايش في قلوبنا ومش هننساه من دعائنا. وإحنا خلاص بقينا في اليوم الثامن، ودي فرصة نكتب كتابك من غير حفلة، لانه مافيش عريس يشوفوه، وهتبقى الناس تحترمك لأنك بقيتي في عصمة راجل غني ومشهور، وماحدش هيقدر يجيب في سيرتك لأنك عايشه لوحدك بعد وفاة والدك !!
'توليب' :- طب وأخوكي بيفكر يسكني فين؟ مع مراته في بيت واحد ولا في بيت ثاني لوحدي ؟!!
'حنان' - بتردد - :- أنا نسيت ما أقولك على شرط أخويا الثاني !!
'توليب' :- وهو لسه عنده شرط غير ما تكون عروسته بشعة؟ ما تقولي على كل شروطه حتى أعرف أخذ قراري ؟!!
'حنان' :- الباقي شرط واحد بس أنتي ماسبتنيش أكمل كلامي في الأول !!
'توليب' :- إيه؟ يمكن عايزني أبعد عن خلقته ؟!!
'حنان' :- عبقرية إزاي عرفتيها لوحدك ؟!!
'توليب' :- إيه؟ لاااا دي مابقتش جوازة ولا حتى جنازة، دي بقت إهانه لإبعد حد ؟!!
'حنان' :- صبرك مافيش إهانة ولا حاجة أنتي بس هتسكني في بيت والدك !!
'توليب' :- الله عليكم يعني عايزيني أتجوز وأقعد في بيت والدي ؟!!
'حنان' :- لااا أنا مش هسمح أنك تعيشي في بيت والدك، أسمعي أنا جهزت خطة جهنمية هنقدر نلعب بيها على اخويا، أومال إزاي هنقدر ننقذه من أنياب 'نرجس'؟ ركزي معايا، ابن خالي 'عماد' هيتجوز بعد أسبوعين، وأخويا حلف على خالي 'فرحان' تقدير ليه لأنه وقف جنبه أيام دراسته، ولأنه ساعد في تربيتنا، إن العيلة كلها تجتمع في القرية ونقضي أسبوع مع بعض نحتفل بجواز ابنه !!
'توليب' :- وأنا طبعاً ممنوع أحضر مع العيلة لأن أخوكي مش عايز يشوفني ؟!!
'حنان' :- اسمعي لبقية الخطة، أنتي هتسافري معانا وكأنك ممرضة لخالتي 'زهراء'. أنتي تعرفيها هي ست كبيرة وعايشة لوحدها وهتكوني مرافقة ليها وهتسكني معاها في نفس الأوضة !!
'توليب' :- وخالتك موافقة أسكن معاها ؟!!
'حنان' :- قولت لك يا بنتي أنا جهزت كل حاجة وتفاهمت معاها، وهي انبسطت أنك تكوني ممرضة ومرافقة تقعد معاها ببلاش !!
'توليب' - لنفسها - ... " 'حنان' فعلاً بتحبني، وتعبت كثير بتجهيز خطتها، وأنا مش هخسر لو اتجوزته. بالعكس هيتحقق حلمي أنه يرتبط اسمي بأسمه في ورقة واحدة. ولو ماحصليش نصيب معاه في الدنيا إن شاء الله يبقى نصيبي في الآخرة !! " ...
'حنان' :- هاه سرحتي في إيه ؟!!
التفتت 'توليب' إلى 'حنان' وهي سعيدة بخطة الأخيرة..
'توليب' :- وااو أنتي بجد طلعتي خطيرة قوي !!
'حنان' :- طبعاً المهم جهزي نفسك مع 'عبد الله' واستنونا الليلة، وأنا و'فادي' هنجي مع المأذون ونكتب كتابك على أخويا إن شاء الله !!
'توليب' :- إن شاء ألله. طب لحظة ولو أخوكي عرف بالخطة، مش يمكن يطلقني؟ وأنا هعمل إيه ؟!!
'حنان' :- أخويا عارف أنك اللي هتتجوزيه وأنتي وشطارتك تخليه يوقع في حبك في أسبوع واحد، فترة فرح إبن خالي !!
'توليب' :- ولو ماقدرتش أخليه يحبني أعمل إيه ؟!!
'حنان' :- ماتخافيش أنتي هتبقي على ذمته بقية عمرك لكن أهم حاجة ماتخليهوش يشوف وشك ويعرف أنك اللي كنتي مرافقة لخالتي 'زهراء' !!
'توليب' - بفزع - :- يا خبر إزاي هقدر أخبي نفسي منه لنهاية عمري؟ هو أنتي حاسه أنه هيزعل لو اكتشف الحقيقة ؟!!
'حنان' :- أكيد هيزعل، هو أنتي فاكره أنه هيفرح ويصفق لخداعنا ليه لما يكتشف لعبتنا ؟!!
'توليب' :- يا لهوي !!
'حنان' :- أنسي، ماتفكريش دلوقتي إيه اللي هيحصل في المستقبل، خلينا أول حاجة نعمل الخطوة الاولى !!
'توليب' :- حاضر !!
'حنان' :- ودلوقتي روحي لابن أخوكي وبلغيه إنك هتتجوزي الليلة وتطمنيه أنك خلاص هتبقي في أمان وأنتي على ذمة أخويا 'عبد الحميد' !!
فكرت 'توليب' في عرض 'حنان'، وتذكرت الأيام الصعبة التي مرت بها، والذي لم يكن يصبرها ويخفف عنها أحزانها سوى التفكير في 'عبد الحميد'..
وصور 'عبد الحميد'..
༺༻